ادارہ شماریات کے موثر اعدادوشمار سے پالیسی سازی آسان ہوگی ،پبلک پرائیویٹ پارٹنر شپ سے وسائل کا بہتر استعمال ممکن ہوگا ، مشیر خزانہ حفیظ شیخ

اسلام آباد ( ٹی این آئی) گور نر اسٹیٹ بینک رضا باقر نے کہا ہے کہ پالیسی ریٹ 7فیصد پر برقرار رکھا گیا ہے ، اس اقدام سے کاروباری سرگرمیاں فروغ پائیں گی،مانیٹری پالیسی اقتصادی بحالی کے مقصد کیلئے بنائی گئی ہے ، مختلف اقدامات سے آئندہ چند ماہ میں مہنگائی کا رجحان کم ہو گا۔ مشیر خزانہ عبدالحفیظ شیخ کی زیر صدارت مانیٹری و فسکل پالیسی بورڈ کا اجلاس ہوا جس میں مشیر تجارت ، ڈپٹی چیئرمین پلاننگ کمیشن ، سپیشل سیکرٹری خزانہ ،گورنر سٹیٹ بنک ، چیئرمین ایف بی آر اوردیگر بھی شریک ہوئے ۔
اجلاس میں ملکی معیشت ، اقتصادی اشارئیوں اور دیگر پہلوئوں کا جائزہ لیا گیا ۔سپیشل سیکرٹری خزانہ نے ملکی معیشت کی صورتحال پر تفصیلی بریفنگ دی اور اقتصادی ترقی اور روزگار کے مواقع پیدا کرنے کیلئے اقدامات بتائے ۔گورنر سٹیٹ بنک نے مائیکرو اکنامک فریم ورک پر ٹیکنیکل کمیٹی کو سراہا۔گور نر سٹیٹ بینک نے کہاکہ پالیسی ریٹ 7فیصد پر برقرار رکھا گیا ہے ، اس اقدام سے کاروباری سرگرمیاں فروغ پائیں گی ۔گورنر سٹیٹ بنک نے کہاکہ مانیٹری پالیسی اقتصادی بحالی کے مقصد کیلئے بنائی گئی ہے ، مختلف اقدامات سے آئندہ چند ماہ میں مہنگائی کا رجحان کم ہو گا۔
مشیر تجارت نے کہاکہ مالی سال کے پہلے دو ماہ میں برآمدات 3.6ارب ڈالر رہیں ، مالی سال کے پہلے دو ماہ میں درآمدات 6.9ارب ڈالر رہیں ، مختلف اقدامات سے تجارتی خسارہ کم کرنے میں مدد ملی ۔مشیر تجارت نے کہاہک ستمبر میں ملکی برآمدات میں نمایاں اضافہ متوقع ہے ، کرنٹ اکائوٹ سرپلس میں رہنے سے ایکسچینج ریٹ پر مثبت اثرات ہوئے ہیں ۔ ڈپٹی چیئر مین منصوبہ بندی نے کہاکہ کورونا وباء کے باعث صارفین اور سرمایہ کار کااعتماد متاثر ہوا ، حکومتی ریلیف پیکیج اور دیگر اقدامات سے صورتحال اب بہتر ہورہی ہے ۔
مشیر خزانہ نے کہاکہ پالیسی بورڈ کو اقتصادی چیلنجز سے نمٹنے میں اہم اور مرکزی کردار ہے ، برآمدات کے فروغ، مہنگائی میں کمی اور بہتروسائل ضروری ہیں ، ادارہ شماریات کی استعداد کار میں اضافہ انتہائی ضروری ہے ، ادارہ شماریات کے موثر اعدادوشمار سے پالیسی سازی آسان ہوگی ،پبلک پرائیویٹ پارٹنر شپ سے وسائل کا بہتر استعمال ممکن ہوگا ۔