وفاقی کابینہ بجلی اور گیس صارفین پر ڈیڑھ سو ارب روپے اضافی بوجھ ڈالنے کا حتمی فیصلہ کل کریگی

اسلام آباد (ٹی این آئی)وفاقی کابینہ بجلی اور گیس صارفین پر ڈیڑھ سو ارب روپے اضافی بوجھ ڈالنے کا حتمی فیصلہ کل منگل کو کرے گی۔ذرائع کے مطابق وزیراعظم عمران خان کی زیر صدارت وفاقی کابینہ کا اجلاس کل منگل کو دن 12 بجے طلب کیاگیا ہے جس میں 15 نکاتی ایجنڈے پر غور کیا جائے گا۔
حکومتی ذرائع نے نجی ٹی وی کو بتایاکہ بجلی اور گیس مہنگی کرنے کا معاملہ کابینہ کے سامنے رکھا جائیگا تاہم وزیراعظم اور وفاقی کابینہ کی منظوری سے ہی بجلی اور گیس صارفین پر ڈیڑھ سو ارب روپے اضافی بوجھ ڈالنے کا حتمی فیصلہ کیا جائیگا۔ذرائع کے مطابق گھریلو صارفین کیلئے بجلی 1.62 روپے فی یونٹ، کمرشل و صنعتی صارفین کیلئے 2.63 روپے تک مہنگی کرنے کی تجویز پیش کی جائے گی جب کہ ماہانہ 200 یونٹ والے صارفین کیلئے بجلی 32 پیسے مہنگی کرنے پر بھی غور ہوگا۔
ذرائع نے بتایا کہ کابینہ میں گیس 15 فیصد تک مہنگی کرنے کی تجویز بھی پیش کی جائیگی اور گھریلو صارفین کے گیس میٹر رینٹ کی مد میں ماہانہ 20 روپے اضافے پر بھی غور ہوگا۔اقتصادی رابطہ کمیٹی 30 ستمبر کے فیصلے میں بجلی گیس مہنگی کرنے کی سفارش کرچکی ہے جس کو منظوری کے پیش کیا جائے گا۔ذرائع کے مطابق آئی ایم ایف پروگرام بحالی کے لیے بجلی، گیس مزید مہنگی کرنے کی ڈیمانڈ رکھی گئی ہے۔