اپنی بچیوں کے مستقبل پر سرمایہ کاری کرنے والی اقوام اپنی دور کیلئے قابلِ فخر ہیں،بلاول بھٹو زر داری

اسلام آباد (ٹی این آئی) پاکستان پیپلز پارٹی کے چیئرمین بلاول بھٹو زرداری نے کہاہے کہ اپنی بچیوں کے مستقبل پر سرمایہ کاری کرنے والی اقوام اپنی دور کیلئے قابلِ فخر ہیں،فاطمہ جناح اور شہید محترمہ بینظیر بھٹو نے اپنے دور کے بدترین فوجی آمروں کے خلاف قوم کی قیادت کی، دورہنما پاکستانی لڑکیوں کی رول ماڈل ہیں ۔ اتوار کو بچیوں کے عالمی دن پر اپنے پیغام میں انہوںنے کہاکہ اپنی بچیوں کے مستقبل پر سرمایہ کاری کرنے والی اقوام اپنی دور کیلئے قابلِ فخر ہیں۔
انہوںنے کہاکہ ایسی اقوام پرامن، بقائے باہمی و ترقی پسند معاشروں کی بنیاد کو مظبوط بنانے کا باعث ہیں۔بلاول بھٹو زرداری نے کہاکہ مذکورہ قومیں محدود وسائل رکھنے والے ممالک کے لیئے بھی حوصلہ بڑھا رہی ہیں،فاطمہ جناح اور شہید محترمہ بینظیر بھٹو پاکستانی لڑکیوں کی رول ماڈل ہیں۔
انہوںنے کہاکہ فاطمہ جناح اور شہید محترمہ بینظیر بھٹو نے اپنے دور کے بدترین فوجی آمروں کے خلاف قوم کی قیادت کی۔ انہوںنے کہاکہ ہر پاکستانی لڑکی کو اگر مطلوبہ ماحول، تعلیم اور سہولیات فراہم کی جائیں تو وہ فاطمہ جناح اور (شہید محترمہ) بینظیر بھٹو بننے کی صلاحیت رکھتی ہیں۔ بلاول بھٹو زرداری نے کہاکہ حالیہ ملکی تاریخ گواہ ہے کہ کس طرح ایک نہتی لڑکی ملالہ یوسفزئی نے تاریک دور کے لشکروں کو للکارا۔ انہوںنے کہاکہ اس نے کھڑی کی گئی رکاوٹوں اور جبر کا مقابلہ کیا۔
انہوںنے کہاکہ ملالہ نے اپنے خوابوں کو پایہ تکمیل پر پہنچانے کے لئے اعلی تعلیم حاصل کرنے میں سرخرو ہوئی،ہمیں اس پر توجہ دینے کی ضرورت ہے کہ زندگی کے ہر شعبے میں لڑکیوں کو یکساں مواقع فراہم ہوں،اس کے ساتھ ساتھ لڑکیوں کو بااختیار بنانے اور ان کے حقوق کے تحفظ کے سلسلے میں درپش مشکلاتوں کا تدارک ہو۔
بلاول بھٹو زرداری نے کہاکہ پیپلز پارٹی لڑکیوں کیلئے تعلیم و صحت کی سہولیات اور آگے بڑھنے کے مواقع تک رسائی کی حامی ہے،پیپلز پارٹی ملک میں صنفی مساوات کی علمبردار جماعت ہے۔ انہوںنے کہاکہ پی پی پی نے گرلز کیڈٹ کالج، خواتین کے لئے پولیس اسٹیشنز، فرسٹ ویمن بینک کا قیام عمل میں لائی۔بلاول بھٹو زرداری نے کہاکہ پیپلز پارٹی کی حکومتوں نے بے زمین خواتین کسانوں کو زرعی زمیں الاٹ کیں۔