لاہور (ٹی این آئی) لاہور سے پاکستان مسلم لیگ ن کے رہنما اور سابق ایم پی اے ملک سیف الملوک کھوکھر پر ڈی سی لاہور مدثر ریاض کی درخواست پر اینٹی کرپشن میں پرچہ درج کر لیا گیا۔
تفصیلات کے مطابق ڈپٹی کمشنر لاہور مدثر ریاض نے اپنے ریفرنس میں ملک سیف الملوک کھوکھر کے خلاف جعل سازی اور بد نیتی سے سرکاری خزانے کو فیس کی مد میں نقصان پہنچانے پر پرچہ درج کرنے کی استدعا کی تھی ۔ حلقہ پٹواری افتخار احمد اور سب رجسٹرار دفتر علامہ اقبال ٹاؤن لاہور کے سابق آر ایم ون راجہ ندیم بھی مقدمے میں نامزد ہیں۔ ڈی سی لاہور نے اپنے ریفرنس میں کہا کہ ملزمان نے حقائق چھپاتے ہوئے سرکاری خزانے کو رجسٹریشن فیس کی مد میں لاکھوں روپے کا نقصان پہنچایا۔ملزم نے حلقہ پٹواری افتخار اور دفتر سب رجسٹرار علامہ اقبال ٹاؤن کے سابق آر ایم راجہ ندیم کی ملی بھگت سے غیر قانونی سرنڈر ڈیڈ رجسٹر کروائی۔ملزمان نے سٹیمپ ایکٹ کی خلاف ورزی کرتے ہوئے رقبہ 22 کنال 11 مرلہ
جعل سازی ، بدنیتی اور فراڈ سے جعلی سرنڈر ڈیڈ درج کرائی۔ سرنڈر ڈیڈ مشترکہ وراثت کی منتقلی یا فروخت کے وقت تیار کی جاتی ہے۔
ڈی سی نے اپنے ریفرنس میں واضح کرتے ہوئے کہا کہ ملزم نے فرزند علی اور عثمان سے رقبہ خریدا ۔ فروخت کنندہ فرزند علی اور عثمان نے جب سرنڈر ڈیڈ درج کروانے کے لئے فرد رپٹ نکلوائی تو وہ جائیداد کے شراکت دار نہ تھے۔ ملزم نے سرکاری اہلکاروں کی ملی بھگت سے مختلف فیسوں کی مد میں خزانہ سرکار کو بھاری نقصان پہنچایا ۔
اس حوالے سے اینٹی کرپشن حکام کا کہنا تھا کہ سرکاری خزانے کی ایک ایک پائی وصول کی جائے گی۔ پنجاب بھر میں کرپٹ عناصر کے خلاف بلاامتیاز کاروائیاں جاری رہیں گی۔
