کراچی(ٹی این آئی)پی ایس ایل 8 کے کراچی میں میچز کیلیے انتظامات کو حتمی شکل دے دی گئی۔پی ایس ایل 8 کے کراچی میں میچز کیلیے انتظامات کو حتمی شکل دے دی گئی جب کہ پچز کی تیاری کا عمل آخری مراحل میں پہنچ گیا، گھاس کو کاٹ دیا گیا، خیال کیا جارہا ہے کہ پچز بیٹنگ کے لیے مددگار ثابت ہوں گی۔
تماشائیوں کو سہولیات کی فراہمی کے لیے خصوصی انتظامات کیے گئے ہیں،نشستوں کی صفائی کرلی گئی، تماشائیوں کو اشیاء خوردونوش کی فراہمی کے لیے فوڈ اسٹالز لگائے گئے ہیں۔
ایس ایس یو کے کمانڈروں نے کسی بھی ہنگامی صورتحال سے نمٹنے کے لیے گراؤنڈ میں خصوصی مشق کی، ایونٹ میں شریک تمام ٹیموں اور غیر ملکیوں سمیت متعلقہ ذمہ داران کو وی وی آئی پی کا درجہ دے کر خصوصی سیکیورٹی فراہم کی جارہی ہے۔
دوسری جانب دونوں ٹیموں نے بھرپور مشقوں کا سلسلہ جاری رکھتے ہوئے ہتھیار چمکا لیے،بیٹرز نے نیٹ میں جارحانہ انداز اپناتے ہوئے خود کو سازگار کنڈیشنز سے ہم آہنگ کیا،بولرز بھی لائن و لینتھ میں بہتری لانے کے لیے کوشاں رہے۔
