کراچی(ٹی این آئی)وفاقی وزیر اسد عمر نے حزب اختلاف کی جماعتوں کو مل کر بات کرنے کی پیشکش کرتے ہوئے کہاہے کہ اپوزیشن کل آجائے، ہمارے دروازے ان کے لیے کھلے ہیں۔
میڈیاسے گفتگو کرتے ہوئے اسد عمر نے کہا کہ اپوزیشن سے ان کی چوری کے سوا ہر معاملے پر بات کرنے کو تیار ہیں۔اپوزیشن توانائی، معیشت کی بہتری پر بات کرناچاہتی ہے تو ہم تیار ہیں، اپوزیشن مہنگائی کو کم کرنے کے لیے بات کرناچاہتی ہے تو ہم تیار ہیں۔انہوں نے کہا کہ اپوزیشن اپنی چوری بچانے کے علاوہ کسی اور چیز پر بات کرنے کو تیار نہیں، اپوزیشن ہمارے ساتھ ایک ماہ پہلے تو بیٹھ کر بات کررہی تھی، ایک ماہ میں کیا ہوگیا؟۔انہوں نے کہاکہ اپوزیشن نے ایف اے ٹی ایف پر بلیک میل کرنے کی کوشش کی، اپوزیشن اپنی چوری بچانے کے لیے سڑکوں پرآنا چاہتی ہے۔وفاقی وزیر نے کہا کہ اپوزیشن کو نیب نے جیلوں میں بھیجا، شہباز شریف کے ایک دو کیس نئے ہیں باقی انہوں نے ایک دوسرے کے خلاف بنائے تھے۔اپوزیشن کو امید تھی کہ شاید انہیں این آر او مل جائے گا۔
