بیروت (ٹی این آئی)لبنان کے دارالحکومت بیروت کی بندرگاہ پر آگ لگ گئی،بندرگاہ پر امونیم نائٹریٹ کے گودام میں تباہ کن دھماکے کے ایک ماہ اور چھے روز کے بعد یہ آگ لگی ۔میڈیارپورٹس کے مطابق لبنان کے ایک عسکری ذریعے نے بتایاکہ ٹائروں اور تیل کے ایک گودام میں آگ لگی ہے۔تاہم بندرگاہ کے ڈائریکٹر کا کہنا ہے کہ آگ کے سبب کے بارے میں فوری طور پر کچھ کہنا قبل از وقت ہوگا۔لبنان کی انجمن ہلال احمر نے آتش زدگی کے اس واقعے میں لوگوں کے زخمی ہونے سے متعلق اطلاعات کی تردید کی ۔ البتہ ان کا کہنا تھا کہ بعض لوگوں کو سانس لینے میں دشواری کا سامنا ہے۔بیروت کے مکینوں نے سوشل میڈیا پر بندرگاہ پر لگی آگ کی ویڈیوز سوشل میڈیا پر اپ لوڈکردیں۔آگ بجھانے والا عملہ جائے وقوعہ پر پہنچ چکا ہے اور وہ امدادی سرگرمیوں میں مصروف ہے۔لبنانی فوج نے ایک بیان میں کہا کہ فوجی ہیلی کاپٹروں کو بھی آگ پر قابو پانے کی امدادی سرگرمی میں حصہ لینے کے لیے بھیجا جارہا ہے۔مقامی ٹیلی ویژن نے ایک ہیلی کاپٹر کے بندرگاہ کی فضا میں پرواز کرتے ہوئے فوٹیج نشر کی ہے۔
