اسلام آباد ( ٹی این آئی) مشیر اطلاعات خیبر پختونخوا کامران بنگش نے کہا ہے کہ صوبے کے جن اسکولوں میں کورونا ٹیسٹ مثبت آئے وہ بند کر دیے گئے۔
خیبر پختونخوا کے اسکولوں میں کورونا ٹیسٹ کیے جارہے ہیں اور ضلعی سطح پر انتظامیہ کی جانب سے کورونا ایس اوپیز کا جائزہ لیا جا رہا ہے۔نجی ٹی وی سے گفتگو کرتے ہوئے وزیر اطلاعات کا کہنا تھا کہ موسم کی تبدیلی کے ساتھ کورونا کے پھیلاوَ کا خدشہ تھا، کورونا ٹیسٹنگ کی استعداد بڑھا رہے ہیں۔
دوسری جانب خیبرپختونخوا حکومت نے اسکولز میں کورونا پھیلنے کے خدشہ کے پیش نظر تمام اسکولز میں بریک ختم کرنے کا فیصلہ کیا ہے۔محکمہ تعلیم کی جانب سے جاری کردہ اعلامیہ میں اسکولوں میں صبح اسمبلی کے انعقاد پر بھی پابندی عائد کی گئی ہے۔محکمہ تعلیم خیبر پختونخوا کی جانب سے جاری کردہ اعلامیہ کے مطابق خیبرپختونخوا کے اسکولوں کے اوقات میں بھی تبدیلی کردی گئی ہے۔
ہائی اسکول کی چھٹی ایک بج کر 30 پر ہوگی، پرائمری اسکولز کے اوقات کار صبح 8 بج کر 30 منٹ سے لے کر 12 بج کر 30 منٹ تک ہوں گے۔محکمہ تعلیم کی جانب سے انتظامیہ کو اسکولوں میں ایس او پیز پر سخت عمل درآمد کی ہدایت کی گئی ہے۔
