نیب انتقامی ادارہ ہے ،حزب اختلاف 20 ستمبر کو اپنے لائحہ عمل کا اعلان کرے گی، رانا ثنا اللہ

لاہور(ٹی این آئی) مسلم لیگ ن کے مرکزی رہنما رانا ثنا اللہ نے کہا ہے کہ حزب اختلاف 20 ستمبر کو اپنے لائحہ عمل کا اعلان کرے گی۔جمعرات کو لاہور میں میڈیا سےگفتگو کرتے ہوئے انہوں نے کہا کہ نیب احتساب کا نہیں انتقام کا ادارہ ہے اور نوٹس دینا نیب کی مجبوری ہے۔انہوں نے کہا کہ نیب احتساب کے ادارے کے طور پر نہیں چل رہا کیونکہ بلین ٹری انکوائری میں تو کسی کو گرفتار نہیں کیا گیا جبکہ حزب اختلاف رہنماﺅں کو انکوائری کے دوران ہی گرفتار کر لیا جاتا ہے۔رانا ثنا اللہ نے کہا کہ نیب کو ساری ہدایات حکومت دیتی ہے اور نیب کے سب لوگ بلیک میل ہو رہے ہیں تاہم عوام کو آل پارٹیز کانفرنس(اے پی سی) سے اچھی خبر ملے گی۔ نیب کے لوگ اپنی نوکری کے غلام ہیں اور نیب اس وقت اپنی ناک پر بیٹھی مکھی بھی نہیں ہلا سکتا۔ حزب اختلاف 20 ستمبر کو اپنے لائحہ عمل کا اعلان کرے گی۔