اسلام آباد (ٹی این آئی)وفاقی وزیر برائے اطلاعات و نشریات سینیٹر شبلی فراز نے کہا ہے کہ وزیراعظم عمران خان نے اقوام متحدہ کی جنرل اسمبلی سے خطاب میں کشمیر کا مسئلہ بھرپور طریقے سے دنیا کے سامنے اٹھایا۔سوشل میڈیا پر جاری اپنے بیان میں شبلی فراز نے کہاکہ وزیراعظم عمران خان نے ایک بار پھر تاریخی خطاب کرکے پوری قوم کا سر فخر سے بلند کر دیا، وزیراعظم نے کشمیریوں کا مقدمہ دنیا کے سامنے ڈٹ کر پیش کیا۔سینیٹر شبلی فراز نے کہا کہ مسئلہ کشمیر حل کیے بغیر خطے میں امن کا قیام ایک خواب رہے گا۔
انہوںنے کہاکہ وزیراعظم نے اقوام عالم کو باور کرایا کہ کشمیریوں کے حق خود ارادیت کو پامال کیا جا رہا ہے۔شبلی فراز نے کہاکہ عمران خان نے آر ایس ایس کے انتہا پسند نظریے اور بھارت میں مسلمانوں پر ڈھائے جانے والے مظالم کو بے نقاب کیا۔انہوںنے کہاکہ اس کے علاوہ وزیراعظم نے منی لانڈرنگ کے ذریعے بیرون ملک بھیجے گئے چوری کے پیسے کی واپسی کے لیے فریم ورک کے خلاف پختہ عزم کا واضح اظہار کیا اور کورونا وبا سمیت تمام اہم عالمی امور پر گفتگو کی۔
