وزیراعظم عمران خان کا ویژن بے روزگار عوام کو معاشی طور پر خود کفیل بنانا ہے'فیاض الحسن چوہان
لاہور (ٹی این آئی) صوبائی وزیراطلاعات فیاض الحسن چوہان نے کہا ہے کہ وزیراعظم عمران خان کا ویژن بے روزگار عوام کو معاشی طور پر خود کفیل بنانا ہے۔پنجاب روزگار اسکیم پر بات کرتے ہوئے وزیر اطلاعات پنجاب فیاض الحسن چوہان کا کہنا ہے کہ اس اسکیم کے تحت کم شرح سود پر ایک لاکھ سے ایک کروڑ روپے تک قرضے دیئے جائیں گے اور تیس ارب روپے کے اس پروگرام سے تقریبا سولہ لاکھ خاندانوں کے لیے روزگار کے مواقع پیدا ہونگے۔
انہوں نے کہا کہ گزشتہ ادوار میں ترقیاتی اسکیمیں ذاتی پسند ناپسند کی بنیاد پر شروع کی جاتی رہیں لیکن موجودہ حکومت کی اسکیم میں چھوٹی اور درمیانے درجے کی صنعتوں اور اسپیشل افراد کیلئے خصوصی سہولیات رکھی گئی ہیں۔فیاض الحسن نے کہا کہ نام نہاد خادم اعلی نے پڑھے لکھے نوجوانوں کو رکشہ اور ٹیکسی دے کر ان کے ہنر کو ضائع کیا ،بڑے منصوبوں پر قومی خزانے کو پانی کی طرح بہا کر ذاتی تشہیر شریف خاندان کا وطیرہ رہا مگر عثمان بزدار کے زیرانتظام تمام منصوبے ٹارگٹڈ اور نتائج کے شفاف نظام پر مبنی ہیں۔