لاہور (ٹی این آئی) ڈی جی اینٹی کرپشن محمد گوہر نفیس نے ٹویٹر پر ریٹائرڈ ٹیچر عذرا ظفر کی فریاد سُن کر اس کا پلاٹ ہتھیانے والے قبضہ مافیا کے خلاف انکوائری کے بعد پرچہ کٹوا دیا۔ معاملے کی مکمل انکوائری کے بعد سات افراد کے خلاف پرچہ درج کیا گیا۔ غیر قانونی قابضین ارشد علی اور محمد عثمان وغیرہ سمیت سات افراد پر مقدمہ درج ۔ایس سی او لینڈ ریکارڈ سینٹر ملتان ندیم لودھی اور رجسٹری برانچ کے جونئیر کلرک ندیم چٹھہ بھی پرچے میں نامزد ہیں۔ جعلی انتقال کے ٹوٹنے پر خاتون کا پلاٹ واگزار کرا لیا جائے گا۔ اس حوالے سے محکمہ مال کو مراسلہ ارسال کیا جا چکا ہے۔
تفصیلات کے مطابق خاتون استاد کے ملتان آفیسرز کالونی میں پلاٹ پر قبضہ مافیا مسلط تھا۔ ڈی جی اینٹی کرپشن محمد گوہر نے ریٹائرڈ ٹیچر عذرا ظفر کی ٹویٹر پر فریاد سُن لی۔ قبضہ مافیا نے خاتون ٹیچر کے ایک کنال پلاٹ پر قبضہ کر کے اپنا دفتر بنالیا تھا۔ خاتون نے ٹویٹر پر قبضہ مافیا کے خلاف اپنی درد بھری داستان لکھی تھی۔ ڈی جی اینٹی کرپشن نے معاملہ کا نوٹس لیا تھا۔ چھان بین کے بعد خاتون کی مدعیت میں پرچہ درج کر لیا گیا۔ریجنل ڈائریکٹر اینٹی کرپشن ملتان حیدر وٹو نے خاتون ٹیچر سے رابطہ کرکے حقائق معلوم کئے۔خاتون سے پراپرٹی کی دستاویزات منگوا کر انکوائری شروع کی گئی تھی۔دستاویزات کی چھان بین سے قبضہ مافیا کی جعلسازی واضح ہوگئی ۔
اس حوالے سے ڈی جی اینٹی کرپشن کا کہنا تھا کہ قبضہ میں ملوث ملزمان کے خلاف قانون کے مطابق سزا دلوائی جائے گی۔قبضہ مافیا کے خلاف پنجاب بھر کریک ڈاؤن جاری ہے۔
