تحریک سے حکومت نہیں بلکہ خود اپوزیشن ناکامی کے خوف کا شکار ہے' ہمایوں اختر خان

اسلام آباد( ٹی این آئی)پاکستان تحریک انصاف کے سینئر مرکزی رہنما و سابق وفاقی وزیر ہمایوں اختر خان نے کہا ہے کہ پی ڈی ایم بظاہر اکٹھی لیکن اندر سے استعفوں سمیت کئی معاملات پر تقسیم در تقسیم ہے ، اپوزیشن کے پاس کرنے کیلئے کوئی کام نہیں اگر وہ اپنے لوگوں کو ساتھ رکھنے کیلئے جلسہ جلسہ بھی نہ کھیلے تو کیا کرے ، جمہوری دور میں مذاکرات کے دروازے کبھی بند نہیں ہوتے ، اپوزیشن غیر مشروط طور پر جب بھی بات چیت کیلئے قدم بڑھائے گی ہم اس کاخیر مقدم کریںگے ۔
اپنے ایک بیان میں ہمایوں اختر خان نے کہا کہ اپوزیشن کی اے پی سی نے 26نکات پر مشتمل اعلامیہ جاری کیا لیکن بتایاجائے اس میں عوام اور ملک کے مسائل سے متعلقہ کتنے نکات شامل تھے؟ ۔ پیپلزپارٹی ،مسلم لیگ (ن) اور ان کے اتحادی اپنے کئی دہائیوں کے ادوار کی خرابیوں کا سارا بوجھ ڈھائی سال سے آنے والی حکومت کے کندھوں پر ڈالنا چاہتی ہیں لیکن عوام اتنے بیوقوف نہیں ہیں۔
انہوں نے کہا کہ مصنوعی اورچل چلائو پالیسیوں کو جب سدھارا جائے اور صحیح سمت اپنائی جائے تو پھر مشکلات آتی ہیں لیکن ہم ہرگز مایوس نہیں اورانشا اللہ جلد نمایاں اور مثبت تبدیلیاں نظر آئیں گی۔
انہوںنے کہا کہ مہنگائی کو کنٹرول کرنے کیلئے طلب کے مطابق رسد کو یقینی بنانے ،ذخیرہ اندوزوں اور گراں فروشوں کے خلاف سخت اقدامات اٹھائے جارہے ہیں اور آنے والے دنوں میں قیمتوں میں کمی کے حوالے سے نمایاں نظر آئے گی ۔
اپوزیشن کی تحریک سے حکومت نہیں بلکہ خود اپوزیشن ناکامی کے خوف کا شکار ہے۔