لاہور(ٹی این آئی)ہائیکورٹ نے بیوی کو حق مہر دینے کے حوالے سے اہم فیصلہ سناتے ہوئے واضح کیا ہے کہ اگر نکاح نامے میں حق مہر کی ادائیگی کا وقت درج نہ کیا گیا ہو تو بیوی کے مطالبے پر مہر قابلِ ادا ہوگی، چاہے شادی ختم نہ بھی ہوئی ہو۔ عدالت نے خاتون درخواست گزار کی درخواست کو منظور کرتے ہوئے ٹرائل کورٹ کے فیصلے کو کالعدم قرار دے دیا اور فیملی کورٹ کا فیصلہ دوبارہ بحال کر دیا۔
جسٹس عابد حسین چھٹہ نے سائلہ فاطمہ بی بی کی درخواست پر 6 صفحات پر مشتمل تحریری فیصلہ جاری کیا، جو عدالتی نظیر قرار پایا۔عدالت نے فیصلہ میں لکھا ہے کہ چاہے نکاح برقرار ہو یا ختم، طلاق یا شوہر کی وفات کا انتظار ضروری نہیں۔ اگر نکاح نامے میں مہر کی ادائیگی کا وقت واضح نہ ہو تو مہر مطالبہ پر قابلِ ادائیگی ہوگی۔درخواست گزار فاطمہ بی بی نے اپنے شوہر کے خلاف نان فقیہ، جہیز اور 5 تولے سونے کے مہر کی وصولی کا دعویٰ دائر کیا تھا۔ فیملی کورٹ نے مقدمے کی سماعت کے بعد فاطمہ بی بی کو 5,000 روپے ماہانہ دیکھ بھال اور مہر ادا کرنے کا حکم دیا جبکہ جہیز کا دعویٰ مسترد کر دیا گیا۔
دونوں فریقین نے فیملی کورٹ کے فیصلے کو ٹرائل کورٹ میں چیلنج کیا، جس میں ٹرائل کورٹ نے دیکھ بھال برقرار رکھی، کچھ جہیز یا 2 لاکھ 50 ہزار روپے دینے کا حکم دیا، جبکہ مہر کے دعوے کو ختم کر دیا گیا۔ اس فیصلے کے خلاف درخواست گزار نےہائیکورٹ سے رجوع کیا۔عدالت کے فیصلے کے متن کے مطابق درخواست گزار کے مطابق مہر سے متعلق فیصلہ غلط تھا اور اس کا حق مارا گیا۔ عدالت نے قرار دیا کہ جہیز سے متعلق اپیلٹ کورٹ کا فیصلہ درست ہے لیکن مہر کے معاملے میں اپیلٹ کورٹ کا فیصلہ غلط ہے۔ہائیکورٹ نے فیملی کورٹ کا مہر سے متعلق فیصلہ بحال کرتے ہوئے درخواست گزار کی جزوی درخواست کو منظور کیا۔
عدالت نے اپنے فیصلے میں مزید واضح کیا کہ موخر مہر اگر نکاح نامے میں وقت مقرر نہ ہو تو مطالبہ پر قابلِ ادائیگی ہوگا ،نکاح نامے میں واضح شرط نہ ہونے کی صورت میں بیوی فوری مہر کی حقدار ہوگی۔
بیوی کو مہر کے لیے طلاق یا شوہر کی وفات کا انتظار ضروری نہیں۔مسلم فیملی لاز آرڈیننس 1961 کے سیکشن 10 کی تشریح واضح کرتے ہوئے کہا گیا کہ اگر ادائیگی کا طریقہ کار نامہ میں واضح نہ ہو تو پورا مہر فوری ادا کرنا لازم ہے۔بغیر اجازت دوسری شادی پر موخر مہر بھی فوری ادا ہوگا۔سپریم کورٹ بھی مہر کو مطالبہ پر ادا کرنے کا اصول تسلیم کر چکی ہے۔مہر نکاح کا لازمی جزو ہے اور عدم تعیین پر بھی واجب الادا قرار پاتا ہے۔اسلامی فقہ میں فوری اور موخر مہر کا فرق تسلیم شدہ ہے، لیکن معاہدے کے مطابق مہر کی ادائیگی کا فیصلہ ہوگا۔سپریم کورٹ کے فیصلوں کی روشنی میں اصولوں کی ہم آہنگ تشریح کی گئی ہے۔
مہر کی ادائیگی کا وقت معاہدے اور حالات پر منحصر ہوگا۔عدالت نے مہر کے دعوے کے ساتھ ساتھ جہیز اور نگہداشت الاؤنس کے معاملات پر بھی غور کیا۔ عدالت نے درج ذیل نکات بھی سامنے رکھے:موخر مہر کے دعوے کو سعدیہ عثمان کیس کی روشنی میں مسترد کیا گیا۔فیملی کورٹ نے ریکارڈ اور شواہد کی بنیاد پر صرف مہر کی حد تک فیصلہ کیا۔اپیلٹ کورٹ نے دعویٰ کردہ جہیز یا متبادل رقم کی کمی پر جزوی فیصلہ دیا۔
عدالت نے جہیز کے 250,000 روپے کے مساوی متبادل رقم کا فیصلہ سنایا۔مدعا علیہ کی مالی حیثیت اور درخواست گزار کی ضروریات کے مطابق دیکھ بھال کی مقدار طے کی گئی۔درخواست گزار کو 5,000 روپے ماہانہ دیکھ بھال کا حق دیا گیا۔ ہائیکورٹ کے اس فیصلے سے مہر و جہیز جیسے ازدواجی حقوق کے سلسلے میں واضح عدالتی فریم ورک سامنے آ گیا ہے جو مستقبل میں متعلقہ کیسز کے لیے بھی رہنمائی کا باعث بنے گا۔
