ماضی میں پیش کئے گئے شاہکار ڈرامے دوبارہ آن ائیر کر کے پی ٹی وی کو منافع بخش ادارہ بنایا جا سکتا ہے ' اسلم شیخ

لاہور(ٹی این آئی )سینئر اداکار اسلم شیخ نے کہا ہے کہ دو دہائیاں قبل پیش کئے جانے والے شاہکار ڈراموں کو دوبارہ آن ائیر کر کے پی ٹی وی کو منافع بخش ادارہ بنایا جا سکتا ہے ،سینئر اداکاروں کو نظر انداز کرنے کی وجہ سے قومی ادارہ تنزلی کا شکار ہے ، اگر سینئرز کو واپس لانے کا اقدام کیا جائے تو کامیابی کے راستے کھل سکتے ہیں ۔ ایک انٹر ویو میں اسلم شیخ نے کہا کہ ماضی میں پی ٹی وی سے ایسے شاہکار ڈرامے پیش کئے گئے ہیں جن کے کردار آج بھی لوگوں کے ذہنوں پر نقش ہیں ۔
ان کہی ،وارث،تنہائیاں، دھوپ کنارے ، الفا براوو چارلی سمیت دیگر ایسے بہت سے ڈرامے ہیں جنہیں دوبارہ پیش کر کے بے پناہ منافع کمایا جا سکتا ہے ۔ انہوںنے کہا کہ پی ٹی وی انتظامیہ اپنی پالیسی پر نظر ثانی کرے اور نظرانداز کئے جانے والے سینئر اداکاروں کو عزت کے ساتھ و اپس لایا جائے اور یہی اقدام اس ادارے کی کامیابی کی کنجی ثابت ہوگا۔