لاہور(ٹی این آئی) ایشیا کپ 2025 کے حوالے سے رپورٹس سامنے آئی ہیں کہ ایونٹ کا میزبان بھارت پاکستان کے خلاف میچ اور ایشیا کپ سے دستبردار نہیں ہوسکتا ہے۔رپورٹس کے مطابق ایشیا کپ میں بھارت پاکستان کے خلاف شیڈول کے مطابق کھیلےگا۔رپورٹس میں ذرائع کے حوالے سے دعویٰ کیا گیا ہےکہ حال ہی میں ڈھاکا میں ہونے والے ایشین کرکٹ کونسل (اے سی سی) کے اجلاس میں بھارتی بورڈ نےگرین سگنل دے دیا تھا۔ بھارتی بورڈ کےگرین سگنل دینےکے بعد اب ایونٹ یا پاکستان کے خلاف میچ سے دستبردار نہیں ہوا جاسکتا۔ رپورٹس میں کہا گیا ہےکہ بھارت ایشیا کپ 2025کا میزبان ہے اور اب کوئی تبدیلی اس موقع پر ممکن نہیں ہے۔
بھارتی بورڈکے ذرائع کا کہنا ہےکہ آفیشل سطح پر معاملے پرگفتگو ہوئی جس کے بعد ہی تمام فیصلے ہوئے ۔ بھارتی کرکٹ بورڈ نے اجلاس کے بعد یا شیڈول کے اعلان کے بعد بائیکاٹ کے اوپر کوئی تبصرہ نہیں کیا۔شیڈول کے اعلان کے بعد بھارتی میڈیا نے اپنے بورڈ اور حکومت کو آڑے ہاتھوں لیا ہے۔ ورلڈ چیمپئنز لیگ کی طرح ایشیا کپ میں بھی پاکستان کے خلاف میچ کا بائیکاٹ کرنےکا مطالبہ کیا جارہا ہے۔سابق بھارتی کھلاڑیوں کی جانب سے بھی پاکستان کے خلاف کھیلنےکے فیصلےکو تنقیدکا نشانہ بنایا جارہا ہے۔
خیال رہے کہ ایشیا کپ کے شیڈول کا اعلان گزشتہ روز کیا گیا تھا۔ ایونٹ میں پاکستان اور بھارت کم از کم دو اور زیادہ سے زیادہ تین بار آمنے سامنے آسکتے ہیں۔ ایشیا کپ 9 ستمبر سے شروع ہو گا جب کہ پاک بھارت پہلا گروپ میچ 14 ستمبر کو ہوگا۔
