لاہور(ٹی این آئی)اینٹی کرپشن نے اورنگزیب بٹ کے بیٹے ذیشان بٹ کے خلاف غیر قانونی ہاؤسنگ سوسائٹی بنانے ، قبضہ اور کنورژن فیس کی مد میں سرکاری خزانے کو کروڑوں روپے کا نقصان پہنچانے پر اینٹی کرپشن میں پرچہ درج ۔ ڈپٹی کمشنر گجرات سیف انور جپہ نے گجرات سٹی ہاؤسنگ اسکیم کے مالک زیشان زیب بٹ کے خلاف پرچہ کا ریفرنس اینٹی کرپشن پنجاب کو بھجوایا تھا ۔
ریفرنس میں ذیشان بٹ سمیت مقبول احمد پٹواری ، سجاد اسلم پٹواری ، آصف شفیع اور رضوان چوہدری کے خلاف غیر قانونی طور پر ہاؤسنگ سوسائٹی بنانے پر پرچہ درج کرنے کی استدعا کی گئے۔
ریفرنس کے مطابق ملزمان نے کنورزژن اور رجسٹریشن فیس کی مد میں سرکاری خزانے کو کروڑوں روپے کا نقصان پہنچایا۔ ملزمان غیر قانونی اور بین شدہ ہاؤسنگ سوسائٹی کا رقبہ پلاٹس بناکر سادہ لوح عوام کو بیچ کر فراڈ کر رہے ہیں۔ مذکورہ ہاؤسنگ سوسائٹی جعلی، غیر رجسٹرڈ اور بین شُدہ ہے۔
ریفرنس کےمطابق محکمہ مال کے متعلقہ پٹواریوں مقبول احمد اور سجاد اسلم نے سوسائٹی مالکان کے ساتھ ملی بھگت کرکے دستاویزات تیار کروانے کی کوشش کی۔ ملزم ذیشان بٹ نے اپنے ملازمین کے نام بے نامی جائیداد خرید کر غیر قانونی ہاؤسنگ سوسائٹی بنائی۔
ریفرنس کےمطابق ملزمان نے 41 کنال دو مرلہ رقبہ غیر قانونی طور پر قبضہ کرکے سوسائٹی میں شامل کر رکھا ہے۔ ملزمان کی گرفتاری کے لئے چھاپے مارے جا رہے ہیں ۔ پنجاب بھر میں غیر قانونی ہاؤسنگ سوسائٹیوں کے نام پر عوام الناس کو فراڈ اور دھوکہ دہی سے لُوٹنے والے کرپٹ عناصر کے خلاف کاروائیاں بلا امتیاز جاری رہیں گی۔
