اسلام آباد(ٹی این آئی)اسپیکر قومی اسمبلی نے پی ٹی آئی کے مزید 25 اراکین قومی اسمبلی کے استعفی منظور کرلیے۔ٹی این آئی نیوز کے مطابق تحریک انصاف کے ارکان قومی اسمبلی نے ایوان کی رکنیت سے استعفی دیا تھا تاہم اسپیکر قومی اسمبلی راجہ پرویز اشرف نے کچھ استعفی منظورکے تاہم بقیہ استعفی منظور نہیں کیے اور منظوری کے لیے انہیں فرداً فرداً پیش ہونے کا کہنا تھا۔
تحریک انصاف نے پہلے تو انفرادی طور پر ارکان کی پیشی سے انکار کیا بعدازاں حکومت گرانے اور عام انتخابات کے لیے ارکان کی انفرادی یا اجتماعی پیشی کے لیے ہامی بھری تاہم استعفی منظوری کے مراحل سے نہ گزر سکے۔ایک روز قبل تحریک انصاف کے چیئرمین عمران خان نے قومی اسمبلی میں واپسی کا بیان جاری کیا اور کہا کہ نگراں سیٹ اپ قائم کرنے کے لیے ہم اسمبلی میں واپس جاسکتے ہیں جب کہ چند روز قبل انہوں نے وزیراعظم کے خلاف تحریک عدم اعتماد پیش کرنے کا بھی عندیہ دیا تھا اور اس فیصلے کی تحریک انصاف کی اعلیٰ قیادت نے منظوری بھی دی تھی تاہم آج ارکان اسمبلی کے استعفی منظوری کی خبر سامنے آگئی ہے۔
آج اسپیکر قومی اسمبلی راجہ پرویز اشرف نے مزید 25 ارکان اسمبلی کے استعفی منظور کرلیے ہیں۔ اس حوالے سے قومی اسمبلی سیکریٹریٹ نے نوٹی فکیشن بھی جاری کردیا ہے۔جن ارکان کے استعفی منظور کیے گیے ہیں ان میں مراد سعید، عمر ایوب، اسد قیصر، پرویز خٹک، عمران خٹک، شہریار آفریدی اور دیگر شامل ہیں
